-Qytetet shqiptare në fotografitë e vjetra 1863-1916, ekspozitë në Prishtinë. Kryeshefi ekzekutiv i Agjencisë Shtetërore të Arkivave të Kosovës, Ramë Manaj, tha se profesor Eqrem Zenelaj është një hulumtues i madh i arkivave, fama profesionale e shkencore e të cilit ka tejkaluar hapësirën kombëtare/
Gazeta DIELLI nga korrespondenti në Kosovë Behlul Jashari/
PRISHTINË, 18 Shkurt 2019/ Ekspozita “Qytetet shqiptare në fotografitë e vjetra,1863-1916” është një nga aktivitetet e festimeve të 17 Shkurtit – 11 vjetorit të pavarësisë së Kosovës, e cila vijon të jetë e hapur në Muzeun Kombëtar në Prishtinë.
Ekspozitën e hapi Agjencia Shtetërore e Arkivave të Kosovës nën përkujdesjen e Zyrës së Kryeministrit dhe në bashkëpunim me Eqrem Zenelajn, i cili “pamjet e kohës në fotografi” të qyteteve shqiptare i solli në Kosovë nga Vjena – Austria.
Kryeshefi ekzekutiv i Agjencisë Shtetërore të Arkivave të Kosovës, Ramë Manaj, tha se profesor Zenelaj është një hulumtues i madh i arkivave, fama profesionale e shkencore e të cilit ka tejkaluar hapësirën kombëtare.
“Fotografitë janë pamje edhe të infrastrukturës edhe të urbanizmit të kohës, flasin shumë edhe për zhvillimin krahasuar me të sotmen”, u shpreh ai.
Mes shumë pjesëmarrësve në hapje të ekspozitës ishte edhe ish-Presidenti i Republikës së Kosovës, Fatmir Sejdiu.