PROTESTA- ORGANIZATORET TE DISTANCOHEN NGA VANDALET

Presidentja Jahjaga: Protesta e drejtë demokratike, organizatorët të distancohen nga vandalët/
Presidentja e Kosovës, Atifete Jahjaga, ka thënë se protesta është një e drejtë demokratike e qytetarëve të Kosovës për të shprehur kërkesat e tyre.
Megjithatë, ajo ka dënuar ashpër aktet, të cilat ajo i quan, “vandale” të një grupi protestuesish ndaj pronës publike dhe private të qytetarëve të Kosovës.
“E konsideroj protestën e sotme në Prishtinë si një të drejtë demokratike të qytetarëve të Kosovës për të shprehur kërkesat e tyre. Megjithëkëtë dënoj ashpër aktet vandale të një grupi të vogël protestuesish ndaj pronës publike dhe private të qytetarëve të Republikës së Kosovës dhe kërkoj që organizatorët e protestës të distancohen nga turmat që po sulmojnë Policinë e Kosovës dhe po dëmtojnë institucionet e Kosovës e bizneset në qytet”, ka thënë Jahjaga.
“E drejta për të protestuar është e drejtë e pamohueshme që garantohet dhe ushtrohet në çdo demokraci, por atë e përcjellë edhe përgjegjësia për të ruajtur rendin publik dhe pronën e ndërtuar me shumë sakrificë, djersë e mund nga qytetarët e Kosovës”, u shpreh më tej presidentja Jahjaga.
Në fund, ajo ka ftuar të gjitha palët për qetësi dhe demonstrim të pjekurisë politike dhe shoqërore.