-Muzeu, i vendosur në qendër të Prizrenit, do të jetë i hapur çdo ditë prej sot e deri më 13 gusht nga ora 12:00 deri në 20:00/
PRIZREN, 8 Gusht 2016-Gazeta DIELLI-B.Jashari/ Në Kosovë, në qytetin e Prizrenit, sot, tek keji në afërsi të sheshit të Shadërvanit, hapen zyrtarisht dyert e Muzeut të Korrupsionit, ku do të ekspozohen artefakte të cilat pasqyrojnë mënyrat korruptive të jetesës.
Është ky një bashkëpunim në mes të projektit Anti-Korrupsion të UNDP-së dhe DokuFest-it - Festivalit Ndërkombëtar të Filmit të Shkurtër dhe Dokumentar – edicionit të 15-të, jubilar, që mbahet nga 5 deri në 13 gusht.
“Në këtë muze, që ka konotacion sarkastik, do të ekspozohen artefakte të cilat pasqyrojnë mënyrat korruptive të jetesës. Muzeu ka për qëllim vetëdijësimin e qytetarët rreth mënyrave të korrupsionit, në kohën kur ky fenomen është shpërndarë në shumë fusha dhe po lë pasoja në jetën e qytetarëve të Kosovës”, deklaroi pak më parë UNDP.Muzeu, i vendosur në qendër të Prizrenit, do të jetë i hapur çdo ditë prej sot e deri më 13 gusht nga ora 12:00 deri në 20:00.
Projekti Anti-Korrupsion i UNDP-së mbështetet nga Zyra Zvicerane për Bashkëpunim (SDC) dhe Ministria e Punëve të Jashtme e Danimarkës (DANIDA).
Organizatorët e DokuFest në Prizren kanë deklaruar se, “korrupsioni është tema qendrore e festivalit të këtij viti, konteksti social lokal dhe global si dhe pasojat e tij, të cilat do të theksohen dhe eksplorohen përmes një numri të eventeve, përfshirë panele, diskutime me filmëbërës dhe eskpertë të ftuar ndërkombëtarë dhe lokalë, punëtori dhe në një konferencë të teknologjisë”.